Vaxandi stuðningur við ESB aðildarviðræður hjá Íslendingum

Á Íslandi hefur stuðningur við Evrópusambandið farið ört vaxandi á síðustu misserum. Eins og alþjóð veit samþykkti Alþingi að senda inn aðildarumsókn okkar að bandalaginu þann 16. Júlí síðastliðinn.

Fyrsta skoðanakönnunin, eftir að Alþingi samþykkti aðildarumsóknina, leit dagsins ljós í Fréttablaðinu í morgun.

Skoðanakönnunin fór þannig fram að hringt var í 800 manns þann 28. Júlí og skiptust svarendur jafnt eftir kyni og hlutfallslega eftir búsetu. Var spurt "Ert þú fylgjandi aðildarviðræðum við Evrópusambandið?". 87,1% fólks tók afstöðu og svaraði spurningunni. Voru 58,5% af þeim hlynntir aðildarviðræðum á meðan 41,5% voru á móti.

Einn helsti áróður ESB andstæðinga, eftir 16. Júlí, hefur verið að niðurstaða kosninga Alþingis, um aðildarumsókn okkar, hafi verið ólýðræðisleg og að meirihluti þjóðarinnar vilji ekkert með ESB hafa. Þeir fullyrða einnig að þingmönnum Vinstri Grænna hafi verið hótað öllu illu af Samfylkingunni ef þeir kusu að hafna aðildarviðræðum við Evrópusambandið.

Nú kemur í ljós að stuðningur almennings við aðildarumsóknina er heldur meiri en hjá þingmönnum þjóðarinnar. Í kosningum þingmanna voru 54% hlynntir en 46% á móti. Hvernig útskýra einangrunarsinnarnir það?

Vilja andstæðingar Evrópusambandsins kannski líka halda því fram að svarendum könnunarinnar hafi verið hótað símleiðis?

Lygar, dylgjur og rangfærslur ESB andstæðinga hafa gert þá ómarktæka í þjóðmálaumræðunni. Þjóðin hefur fengið nóg af bulli þeirra og sér nú í auknum mæli að aðild að Evrópusambandinu er hagstæðasti kosturinn fyrir Ísland.

Stuðningurinn mun einungis fara vaxandi með tímanum.

Athugasemdir

[Jón Gunnar Bjarkan, 31.7.2009 kl. 01:43]

Íslendingar hafa verið mjög jákvæðir fyrir aðildaviðræðum í mörg ár núna, oft á tíðum hefur verið beinn stuðningur fyrir að ganga í ESB og taka upp evru án þess meira segja að sjá samninginn.

Hér á wikipedia, stutt með heimildum í viðkomandi skoðanakannanir má sjá hinar ýmsu skoðanakannanir alveg aftur til ársins 2005. Aðeins einu sinni hefur hefur verið meiri andstaða verið við að sækja um(á þessu ári, væntanlega vegna Icesave), aðeins einu sinni verið andstaða við að taka upp evru(árið 2005, gengi krónunnar í bullandi hámarki), og aðeins einu sinni verið meiri andstaða gegn því að ganga í ESB(árið 2006).

Það sem vinnur með ESB sinnum hér er að íslendingar eru almennt vel menntaðir og búa flestir á höfuðborgarsvæðinu.

[Jón Gunnar Bjarkan, 31.7.2009 kl. 02:36]

Skoðanakannanirnar má sjá fyrir miðri síðu. Ég var að bæta þeirri nýjustu inn sem fréttablaðið gerði í gær.

[Björn Halldórsson, 31.7.2009 kl. 21:58]

Það er alveg bráðnauðsynlegt að ganga til aðildarviðræðna svo að innganga okkar í Sambandið verði tryggð fyrir fullt og allt.

[Kjartan Jónsson, 31.7.2009 kl. 22:11]

Jón Gunnar, svo virðist sem þú sért að vísa hér í tengil en ekki er hann sjáanlegur. Þú mættir gjarnan setja hann hér inn.

Ég held að það sé ekki spurning Jón Frímann. Eftir eina eða tvær kannanir mun sambandið njóta stuðnings um 2/3 landsmanna að ég spái.

Ferlið gengur vel fyrir sig Björn enn sem komið er, vonum að svo verði áfram.